Номерæн

 

   Алли адæймаг дæр æ райгурунæй æ рамæлунмæ фæййархайуй йе ΄мхузон адæми астæу рæсугъдæй, кадгинæй, уарзонæй бацæрунбæл, сæ фæсте дæр уæхæнттæ ниууадзунцæ рæсугъд имисуйнæгтæ. Фал нин уæлдай зин фæууй, не ʹхсæнæй ку фæгъгъæуй не ʹмбал, не ʹмгарæ. Уæхæн адæймаг адтæй Гæзæнти – Мæрзойти Фиалæ Ибрагими кизгæ. Уогæ ба ци хъæбæр зин æй, æгириддæр зæрдæ куд нæ комуй Фиали туххæй евгъуд афони дзорун. Фал ци загъдæуа æгъатир хъисмæтæн, кæци æнай - æнойти æригонæй уарзон адæймаг тухтонæ ракодта бийнонтæ, хеуæнттæ, синхбæстæ æма æмбæлтти астæуæй, æрмæстдæр ма содзгæ цæстисуг æнæисусгæ æгъзæлуй æхсæвæй - бонæй. Æхсæвæ бахусгæй дæр æнгъæл кæмæн надтæнцæ, уæхæн сау хабар бауаста сау халон Мæрзойти хæдзарæмæ. Æ уæззаудзийнадæй фегуппæг æнцæ бийнонтæ, сау къæдзæхтæ дæр ма нирризтæнцæ.

   Фиалæ архайдта рæсугъдæй цæрунбæл, царди ивæрæнтæмæ алли бон дæр ести хуарздзийнадæ бахæсгæй. Раст æй цума лæдæргæ кодта, берæ рæстæг уагъд ин не ʹрцудæй а - дуйнебæл бацæрунмæ, уоййау. Æ сувæллонæй исбайлæгъуни уæнгæ адтæй бафæнзуйнаг. Райгурдæй Хæзнидони гъæуи 28 феврали 1960 анзи. Адтæнцæ 9 хуæри ма еунæг æнсувæр. Астæуккаг скъола каст фæууни фæсте бацудæй косунмæ фабрикæмæ ма си фæккуста 1990 анзи уæнгæ. Удта æ нивæ иссердта Сурх – Дигори Мæрзойти хæдзари Артури номбæл. Исæнтæстæй син кæстæртæ – 5 фурти, кæцитæ æнцæ гъæубæсти медæгæ бафæнзуйнаг, алцæмæй æнхæст. Куста дзолгæнæгæй колхози.

   Æгъдау, æфсармæй хайгин, æрдзæ ин парахаттæй балæвар кодта силгоймаги æма æмткæй райсгæй адæймаги хуæздæр менеугутæ, кæцити фæрци рохс кодта, æ алфамбулай ка фæууидæ, уони зæрдитæ. Алке зинбæл дæр ристæй Фиалæ зæрдæбунæй, ескæмæн хуарзи бацæунбæл архайдта. Ци адæми æхсæн куста, уоми дæр ин йе´нæхийнæ уод, æ хæларзæрдæ, адæмуарзондзийнадæ æма арæхстгин кусти фæрци алкæддæр адтæй кадæ. Йе усхъæ бадарунмæ алкæддæр цæттæ. Фал ин æ хуарз уод неци агъаз иссæй амондæн.  

   Æнæкæрон зæрдирист ниууагъта æ фæсте. Æ бийнонтæ, æ бæдæлттæ, хуæртæ, æнсувæр, мондагæй имæ ка байзадæй ма æхуæдæг дæр кæмæй нæ бафсастæй, æ зæрдигъар æнæвгъауæй кæмæн лæвардта, уонæн нæ сор кæнуй сæ цæстисуг. Нæ ерунцæ сæхецæн бунат хори бунмæ. Сæ зæрдхъурмæдзийнадæн кæрон нæййес. Фал адзали тухæн æмбал нæййес. Нæй иронх кæнæн мах дæр. Фæкъкъуру æнцæ синхи цæргутæ. Цæйбæрцæ дæр ку дзорæн, уæддæр не ʼссердзинан Фиали уодигъæдæ, йе ʼдзард цард равдесуни аккаг дзурдтæ.

     Адзалæн мадзал нæййес, фæззæгъунцæ. Мæрдтæй хуæрзауодæн кæнæд Фиалæ æ бийнонтæбæл, æндæр нæ бон неци зæгъун бал æй. Рæсугъд зæрдæ нæ мæлуй, фæззæгъунцæ, фал дуйней фарнæбæл бафтуйуй, ма æ зæрдæ цирагъдарæй байзайæд муггагмæ. Некæд уодзæй иронх кай зудта, ке´хсæн цардæй, уонæй. Некæд уодзæй иронх махæй дæр, æ уарзон синхæнттæй.

                                                         Синхбæстæ.