Номерæн

 

    Дессаг куд нæй цард, еу бон адæймаг игургæ ракæнуй, иннæ бон ба – мæлгæ. Фал цæйдæрбæрцæ рæстæг ку рацæуа, уæддæр ци зин æй, куд нæ фæразуй уорамун æ зин адæймаг, царди æгасемæй ахсгиагдæр æма хъазардæр ка фæууй, еци адæймаги мæлæт. Ци содзгæ, æнæ ´рсабур ристæй нирресуй зæрдæ, ку фæццох уй не ´хсæнæй æма куд нæ сабур кæнуй и рист, цæйбæрцæ цæрай, уæдмæ дæр.

     Мадæ – уомæй дессагдæр царди медæгæ ести ма еске ес? Æвæдзи нæ. Цубур, фал сомий, ардхуæрæни дзурд, æ медæгæ цæйбæрцæ æнкъарæнтæ æвæрд ес – æнæгъæнæ цард, æнæгъæнæ рæстæг, æнæгъæнæ дуйне. 40 бони рацудæй, кæдæй æ цардæй рахецæн æй фæлмæн, зæрдхæлар æма адæмуарзонæй ке зудтонцæ æгас гъæубæстæ дæр, уæхæн хъиамæтгун силгоймаг, Хидирти – Тамати Батгей кизгæ Замеркæ (Дзеукæ). Еунæг бон дæр æ уоди æнцондзийнадæбæл ка нæ басагъæс кодта, фал царди разуайæн ка фæккодта цæргæбонти.          

    Йе ʼносон бæстæбæл бафтудæй рист, фæллад, ездон мадæ, силгоймаги æгас хуарздзийнæдтæй хайгин адæймаг. Райгурдæй æма исгъомбæл æй Хæзнидони гъæуи.  Хидирти хæдзарæмæ Зураппи номбæл цардæмбалæн ку æркувта, еци бонæй фæстæмæ æхе бауарзун кодта æрмæст бийнонтæн нæ, фал хæстæгутæн дæр. Куд хæдзари æфсийнæ, уотæ ин æ раз неке райстайдæ, уомæн æма сувæллонæй æруæзæ кодта йе нагъом усхъитæбæл царди уæзæ. Седзæрæй байзайгæй, адтæй æхсæз сувæллоней хестæр. Кæстæртæ уæддæр дзолæфсес уонцæ, зæгъгæ, амæнтæнмæ къела исæвæридæ, къинсæ никкæнидæ æ бон куд адтæй, уотæ æма дзол исфицидæ.   

     Цæстуарзон, æгъдаугин, рæдаукъох, уæздан æма федар зунди хецауæй æй зудтонцæ синхбæстæ, йе ´мкосгутæ, зонгитæ. Хæстæгутæ кæрæдзебæл бæттæг, хестæрæн æгъдаудæттæг, кæстæрæн зундамонæг адтæй аци силгоймаг. Рæсугъд адæймаг куд кондæй, уотæ уодигъæдæй дæр. Куд хæдзари æфсийнæ, уотæ адтæй царди тухæ æма амонди æстъалу. Еске зинбæл ка зин кодта алкæддæр, еске ристæй ка ристæй, еске цийнæ ба хæстæг ка иста æ зæрдæмæ, уæхæн адæймагæй æй зудтонцæ гъæубæстæ. Ами берæ æнзти дæргъи фæккуста амбулаторий кæстæр медицинон косæгæй æма лæкъун цæстæй некæд некæмæ ракастæй. Адæми ʼхсæн фæццардæй æма фæккуста кæдзос зæрдæй, æнæхийнæ æма æргомæй. Уотæ цæрунбæл ахур кодта æ зæнæги дæр, кæцити исхастонцæ æ цардæмбали хæццæ æма син адæймаги уоди хуархдзийнæдтæй бахай кодтонцæ.

    Царди берæ зинтæ ингæ рауадæй Замеркæн. Раст фæззæгъунцæ, хуарз ун нивæн неци агъаз æй. Æ разæй бацудæнцæ се ʼносон дуйнемæ æ хуæртæ æма йе ʼнсувæртæ. Фал ин æ зæрди едæгтæй еуей ба раскъудта æ бæдолæ Феликси зиани уæззау хабар.

   Куд зин æй ниййерæг мадæн æностæмæ хуæрзбон зæгъун, фал æ индæй хай нæбал ес.  Кæци дуйнебæл æй Замеркæ, уоми хуæрзти хæццæ уæд æ бунат, дзенет æ хай. Ци рæсугъд кæстæртæ ниууагъта æ фæсте, уонæбæл цардауодæн кæнæд. Æ рохс цæсгом, æ рæсугъд зæрдæ некæд уодзæнцæ иронх, ка æй зудта, ке´хсæн цардæй, уонæй.

                           Бабочити Э.