Номерæн

 

Цард... Еу фæккастæй иннемæ. Уалдзигон деденæгау райхæлуй, нæма бафсæдуй адæми ма бийнонти хæццæ цæрунæй, уарзунæй, косунæй, сау мæлæт ба æ базуртæ рауадзуй æма æй æ дзæмбутæй ратонуй се ´хсæнæй.

         Адзал æма цард... Бони рохс æма мæйдар æхсæви талингæ. Сæ еу куд æцæг æй, уотæ æй иннæ дæр. Мæлæт ке нæ хезуй, уæхæн еу дæр нæййес. Фал ци содзгæ, æнæ ´рсабур ристæй нирресуй зæрдæ, ку фæццох уй не ´хсæнæй уæлдай хæстæг, адгин адæймаг.

   Бузойти – Мурити Мæхæмæти кизгæ Валентинæ райгурдæй 1945 анзи Чиколай гъæуи. Бузойти хæдзарæмæ Тамбийи цардæмбалæн ку æркувта, еци бонæй фæстæмæ æхе бауарзун кодта æрмæст бийнонтæн нæ, фал хæстæгутæн дæр. Куд хæдзари æфсийнæ, уотæ ин æ раз неке райстайдæ, адтæй царди тухæ æма амонди æстъалу. Разуайæн кодта цæргæбонти. Игъæлдзæг, цæстуарзон, Сатанай хузæн бæркадкъох æма федар зунди хецауæй æй зудтонцæ синхбæстæ, зонгитæ. Хæстæгутæ кæрæдзебæл бæттæг, хестæрæн æгъдаудæттæг, кæстæрæн зундамонæг адтæй аци силгоймаг. Рæсугъд адæймаг куд кондæй, уотæ уодигъæдæй дæр. Æрцудæй фидиуосæн фондземæн, кæцитæн раййивта мадæ. Фæлмæн, уарзæгой зæрдæ райхалдта Тамбийи зæнæгмæ, кæцитæ си æнцæ хъæбæр боз. Зин æй бæдолæн мадæ раййевун, фал Валя хъаурæгин разиндтæй аци гъуддаги, æхе исбæттун ин бантæстæй, ке номбæл æркувта, уой зæнæг. Тамбийæн æхецæн дæр адтæй æ фарслæууæг, æ уодбæлхуæцæг.

   Ездон, æнæ еу хæрандзийнадæ, цæстуарзон, хуæрзтог, лæгигъæдгун, ескæмæн хуарзи бацæунбæл архайдта - уæхæн силгоймаг адтæй Валя. Еске зинбæл ка зин кодта алкæддæр, еске ристæй ка ристæй, еске цийнæ ба хæстæг ка иста æ зæрдæмæ, уæхæн адæймагæй æй зудтонцæ гъæубæстæ.

       Уой аккаг дзурдтæ иссерун зин æй, цифæнди ку фæдздзорæн, уæддæр. Кай зудта, уонæй ибæл ке зæрдæ нæ нирристæй, ма абони дæр нæ ресуй, уæхæн нæййес æвæдзи.

      Зин æй абони Бузойти бийнонтæн Валян æностæмæ хуæрзбон зæгъун, фал æ индæй хай нæбал ес. Уазал æсмаг æрбакæлуй хæдзарæмæ ма зæрдæ нирресуй. Фал нæ бон ций, зæрдристæй абони Валентинæн рохсаг зæгъунæй уæлдай. Мæрдти бæсти дзенет дæ хай. Дæ фæсте ке ниууагътай, уонæбæл цардауодæн кæнæ. Дæ рохс цæсгом, дæ рæсугъд зæрдæ некæд уодзæнцæ иронх, ка дæ зудта, ке´хсæн цардтæ, уонæй, Валя.

                                                           Кертанти Солтани бийнонтæ.