Номерæн

Ниййерӕг мадӕ - хӕдзари фарнӕ, хӕдзари гъар хор... Сурх-Дигори Секъинати хӕдзарӕ берӕ ӕнзти дӕргъи райдзаст ӕма рохс кӕмӕй адтӕй, бинонтӕ ба нивгун ӕма игъӕлдзӕг - еци хор ӕнӕнгъӕлти ӕрбатар ӕй... ӕ цардӕй рахецӕн ӕй уӕздан силгоймаг, хъазар мадӕ ӕма уарзон нана Секъинати- Бекъурти Зинӕ Габулай кизгӕ...

Хъиамӕтгун мадӕ, хатир...

Адӕймаг, бӕргӕ, цӕрунмӕ райгуруй, фалӕ си дӕубӕл ба, Бекъурон, ӕруадӕй. Арӕх ӕримисисӕ, Зинӕ, дӕ ӕригон бонтӕ, фалӕ ӕнӕидзулгӕй, ӕнкъардӕй... Берӕ адтӕй дӕ царди зиндзийнӕдтӕ ӕма фудӕбӕнттӕ, ӕстонг ӕма уазал бӕнттӕ. Дӕ бӕгъатӕр фидӕ Бекъурти Габула тугъдмӕ рандӕй нӕ Райгурӕн бӕсти сӕрвӕлтау фиццӕгти хӕццӕ, фондз сувӕллоней хӕццӕ ниууагъта ӕ мӕгур бинойнаг Малити Мухай кизгӕ Зӕйрӕти. 1942 анзи ба си уӕ бинонтӕ «сау гӕгъӕди» райстонцӕ.

«Тугъди сувӕллон», Зинӕ, дӕхецӕн зӕрдинез райстай, дӕ фидӕ кӕми нигӕд ӕрцудӕй, уой абони уӕнгӕ дӕр ке нӕ базудтай, уой туххӕй... Байзадӕй уӕ седзӕргӕс мадӕ уӕ хӕццӕ, ӕ коми комидзагӕй уӕ хаста, фалӕ ма ӕй, мӕгур, дӕ имисуйнӕгтӕмӕ гӕсгӕ, Зинӕ, хизта еума уӕззау хабар ... Еу сӕумӕ ӕ биццеутӕй еу, Дзамболат, тракторбӕл хумӕ кодта будури ӕма ибӕл уоми минӕ фехалдӕй. Зӕйрӕт ба ин сӕумӕй фингӕбӕл ӕрцӕттӕ кодта ӕ хуӕруйнаг, уой фӕсте, дзорисӕ, уӕ мадӕ сӕуми ахуадӕнмӕ некӕд бал бавналдта ...

Зумӕги ба арӕх, минкъийтӕ ма ку адтайтӕ, уӕд рацӕуиайтӕ гъӕунгӕмӕ, ма еске хӕдзари сӕрмӕ тохонай хъуӕцӕ ку фӕууиниайтӕ, уӕд сӕмӕ ци хъӕбӕр ӕрхицӕ кӕниайтӕ, ци хъал ӕнцӕ, сог кӕмӕ ес, ци гъар сӕмӕ ӕй, сӕ хӕдзари ӕвӕдзи... Уӕззау рӕстӕг адтӕй уӕд, мӕгур рӕстӕг... Минкъий кизгӕй райдӕдтай, Зинӕ, дӕ хъиамӕтгун мадӕн ӕнхус кӕнун. Колхози куститӕмӕ, скъоладзау уогӕй, ӕнӕзинадӕй ку рауаисӕ, уӕд берети деси бафтауидӕ дӕ фӕразондзинадӕ ӕма дӕ минкъий къохти хъаурӕ.

Уотемӕй ратахтӕнцӕ ӕнзтӕ ӕма скъолай фӕсте бацудтӕ педагогон училищемӕ, райдӕдтай косун гъомбӕлгӕнӕгӕй нӕ

 

райони сувӕллӕнтти рӕвдауӕндӕнтти. Дӕ хуарз кусти туххӕй дин берӕ хӕттити лӕвӕрд ӕрцудӕй паддзахади хуӕрзеугутӕ.

1961 анзи 21 ноябри Сурх-Дигори адтӕй киндзӕхсӕвӕр Секъинати Валоди ӕма Бекъурти Зинӕн. Хестӕрти кувдтитӕ уӕбӕл ӕрцудӕнцӕ, Зинӕ, ӕма уӕ хӕдзарӕ исфедудта ӕхсӕз сувӕллонӕй. Цал ӕнӕхуссӕг ӕхсӕви рарвистай, Зинӕ, авдӕнӕ уозгӕй, уой ма ка зӕгъдзӕй абони?! Йе дессаг адтӕй, еу талингӕй иннӕ талингӕмӕ цӕйбӕрцӕ бавзаридӕ дӕ уод! Хумӕтӕги дин дууӕ хатти лӕвӕрд нæ ӕрцудӕй берӕсувӕллонгин маддӕлти боцгӕнӕн майдан дӕр.

Уӕ кӕдзос хъиамӕттӕй, Валоди ӕма Зинӕ, самадтайтӕ нӕуӕг хӕдзарӕ, сувӕллӕнттӕ еугурдӕр райстонцӕ уӕлдӕр ахурадӕ, афонадӕбӕл сӕ амӕндтӕ иссирдтонцӕ, фӕззиндтӕй син хори хузӕн бӕдӕлттӕ. Никки ба ма ду, Зинӕ, бауарзун кодтай дӕ кӕстӕртӕн аййевадӕ ӕма уӕ хӕдзарӕй арӕх райгъусидӕ фӕндурдзагъд ӕма зарун. Нивгун рӕстӕг! Бӕдӕлтти бӕдӕлттӕ хӕдзари хестӕртӕн феронх кӕнионцӕ сӕ незтӕ ӕма сӕ зиндзинӕдтӕ!

Аци анз 21 ноябри гъӕуамӕ исӕнхӕст атдайдӕ Секъинати Валоди ӕма Бекъурти Зини ӕрттевагӕ киндзӕхсӕвӕрбӕл 60 анзи... Гъулӕггагӕн, фӕстаг ӕнзти Зинӕ ӕнӕфӕразгӕ кодта. Бӕргӕймӕ зилдӕнцӕ ӕ бинонтӕ ӕмбурдӕй дӕр, мадта хуасӕ ӕма дохтур гъӕуагӕ дӕр надтӕй ӕ царди фӕстаг бонти уӕнгӕ дӕр... Фалӕ, уодхӕссӕг, ци хъӕбӕр ӕгъатир разиндтӕ, куд ратудтай тумугъ бинонти астӕуӕй сӕ фӕлмӕн Мади, куд ниууагътай йе ʹнкъай Валодий сау зӕнхӕмӕ кӕсгӕ?! Хъиамӕтгун мадӕ, хатир, нӕ бафистан дин дӕ берӕ хуӕрзтӕ....

Гъигæзæрдæ бинонтæ.