28 ноябрь – Мади бӕрӕгбон

                

     Мӕ абони уацхъуди хъайтар ӕй нӕ минкъий Дигоргоми хъиамӕтгун ӕма фӕрнгун, кадгин ӕма лӕгигъӕдгун, берӕсувӕллонгун силгоймӕгтӕй еу – 87 анздзуд, еузӕрдион цардӕмбал, мадӕ, ӕфсийнӕ, ӕртӕ фӕлтӕрей уарзӕгой нана, кӕстӕртӕмӕ ӕгъдау ӕма фарнӕ кӕмӕй цӕуй рӕдауӕй, еци изӕди хузӕн фӕлдесонд – Сӕбанти Степан ӕма Цакъоон Асиати кизгӕ, Золойти Тотрази (Коляй) (рохсаг уӕд) цардӕмбал Дуня.

   87 анзи…. Адӕймаг деси куд нӕ бацӕуй нӕхемӕ дигорон силгоймаги хъиамӕттӕбӕл расагъӕс кӕнгӕй уойбӕрцӕ рӕстӕги медӕгӕ? Уӕлдайдӕр хонхи дирзӕг царди уавӕрти берӕгай сувӕллӕнттӕ ка хаста, еуи хузӕн сӕ ка дардта ӕма сӕ ка гъомбӕл кодта нӕ рагфиддӕлти хуӕздӕр ӕгъдӕудтӕ ӕма фӕткитӕбӕл, ка сӕ ивардта федар сӕ къӕхтӕбӕл ӕма ма абони дӕр федар цӕгиндзӕ ка’й ӕ бӕдӕлдти бӕдӕлдтӕн, уони бӕдӕлдтӕн.

    Дуня райгурдӕй 1934 анзи бӕрзонд хуӕнхаг гъӕу Нари. Еу рӕстӕгути фӕсте ба Сӕбантӕ, куд берӕ уони хузӕн бийнонтӕ, уотӕ хуӕздӕр цардагорӕг ралигъдӕнцӕ Дигори райони Дур - Дури гъӕумӕ. Ами скъола ӕрмӕст хъӕбӕр хуарз бӕрӕггӕнӕнти хӕццӕ каст фӕууни фӕсте ба Дуня ӕнтӕстгунӕй фӕлварӕнтӕ равардта нӕхе горӕти педагогон институтти историон факультетмӕ. Бӕргӕ батулдта ӕвзигъд кизгӕ ӕ дустӕ ахурмӕ, ӕ минкъиййӕй кӕмӕ бӕлдтӕй, еци ахургӕнӕги дӕсниадӕ райсунмӕ, гъе фал…. Гъудӕй уӕди рӕстӕги авд соми бафедун ахурбӕл, ӕма кӕми иссирдтайдӕ уони седзӕргӕс уоси кизгӕ ба цума, кӕд ӕма е ’ртӕ сувӕллони ӕ мадӕ Асиат туххӕйти, мамӕлай къӕбӕрӕй хаста, уӕд?

    Бийнонти фидӕ Степан сӕребари сӕрбӕлтау равардта ӕ цард – нӕбал исӕздагъдӕй тугъди будурӕй ӕ фиди уӕзӕгмӕ, ӕ минкъий сувӕллӕнттӕмӕ. Нигки ба ма, немуц гъӕу ку байахӕстонцӕ, уӕд Асиати ӕ еу иннемӕй минкъийдӕр сабийти хӕццӕ ратардтонцӕ хӕдзарӕй. Еци уӕззау бонтӕ ци зин байронх кӕнӕн адтӕнцӕ уой фӕсте дзӕвгарӕ рӕстӕгути дӕр. Хуцау хуарз, ӕма сӕ баиуазӕг кодтонцӕ хеуӕнттӕ, нӕ син бавгъау кодтонцӕ сӕ цӕнхӕ - къӕбӕр.       

      Фал нур Дуня, цӕстисуг калгӕ, рацудӕй институттӕй, ӕ бон ахурбӕл бафедун не ’суогӕй. Еу рӕстӕги фӕсте дӕр нӕуӕгӕй  бӕргӕ бацудӕй индустриалон техникуммӕ. Ӕма бабӕй…. «…мӕгурбӕл хӕрдмӕ дӕр дор зелуй», фӕззӕгъунцӕ - ӕмдзӕрӕни ибӕл бунат не ’руайгӕй, фатербӕл федун ба ӕ бон не суогӕй, багъудӕй ӕ ахур ниууадзун ӕма фӕстӕмӕ гъӕумӕ ӕрцӕун. Ӕма ма ӕндӕр ци гӕнӕн адтӕй Дуняйӕн? Ӕ хуӕрӕ ӕма ӕнсувӕри хӕццӕ ӕрлӕудтӕнцӕ сӕ мади фарсмӕ ӕнгом колхози кустити. Хестӕрти хӕццӕ ластонцӕ гъӕдӕй сог дӕр, карстонцӕ хуасӕ, куд уӕди берӕ «тугъди сувӕллӕнттӕ», уотӕ.

     Хуӕрзконд ӕма хуӕрзӕгъдау кизгӕбӕл куд нӕ фӕцайдӕ дзоргутӕ, фал уони астӕу Дуня цардӕмбалӕн равзурста хуӕнхаг, хуӕрзтог ӕма ездон, косагӕ лӕппо Золойти Коляй. «Ахурбӕл ма тухсӕ, ести кӕндзинан, зӕгъгӕ, мин ку загъта Коля, уӕд мӕ цийнӕн кӕрон нӕбал адтӕй. Ӕма мӕ ӕцӕгӕйдӕр исахур кодта фонси гъуд кӕнунбӕл, дзӕхӕрай косунбӕл, хӕдзари куститӕ кӕнунбӕл устур бийнонти ӕхсӕн ӕма син кӕрӕй-кӕронмӕ ӕгъдау дӕдтунбӕл. Мадта ма ӕндӕр ци? Амудта мин фонсмӕ зелун, фӕссӕйгӕ уогӕй куд ӕма цӕмӕй дзӕбӕх кӕнгӕ адтӕнцӕ. Ӕма баизадтӕн ӕрмӕст нӕхе фонсмӕ зелгӕ нӕ, фал ма ӕгас гъӕуи дӕр куд фонси дохтур, уотӕ ӕнхус кӕнгӕ. Ӕма сӕбӕл абони дӕр нӕ фӕсмон кӕнун.

    Мӕ цардӕй алкӕддӕр адтӕн арази. Мӕ сӕри хецауи хӕццӕ лӕдӕрдтан кӕрӕдзей. Тарстан кӕрӕдзей зӕрдихудти бацӕунӕй. Исӕнтӕстӕй нин фондз сувӕллони. Исгъомбӕл сӕ кодтан ӕнӕходуйнаг, исахур сӕ кодтан, иссирдтонцӕ сӕ амӕндтӕ дӕр. Гъаст нӕмӕ си некӕд некӕцӕй ӕрцудӕй ӕма нӕхе нимадтан амондгунбӕл.

Раздӕр, 1960 анзи ба, ралигъдан Чиколамӕ. Коля нимад адтӕй райони медӕгӕ хуӕздӕр механизатор - трактористбӕл – зӕнхикустгӕнӕгбӕл. Лӕвӕрд ин ӕрцудӕй берӕ хуӕрзеугутӕ, уони ӕхсӕн дууӕ - 1 ӕма 2 къӕпхӕни ордентӕ - «Трудовой славы» хундтӕнцӕ. Алли бӕрӕгбони кадӕн дӕр ин уидӕ аллихузон хуӕрзеугутӕ, берӕ майдантӕ, арфи гӕгъӕдитӕ, зӕрдӕбӕлдарӕн лӕвӕрдтӕ. Ӕвзурст ӕрцӕуидӕ арӕх депутӕттӕй дӕр алли рауӕнтӕмӕ. Фал цард ӕнӕ зин дӕр некӕд фӕууй», - фӕззӕгъуй Дуня, ӕ цардӕмбал ӕма ӕ еу бӕдоли коймӕ рахъӕртгӕй, арф ниууолӕфгӕй.

     Адӕм хуарз зонунцӕ, Дуня Коляй кадӕ ӕма фарнӕ дӕлӕмӕ ке некӕд ӕруагъта. Ӕ киндзити хӕццӕ цӕруй, куд мадӕ ӕма бӕдӕлдтӕ, уотӕ. Иссӕй ин 15 бӕдоли бӕдоли ӕма 20 ба ӕртигкаг фӕлтӕри ирӕзгутӕ. Ӕдеугурӕй ба – 40 фӕдони.

    Ӕнӕ зӕгъӕн дӕр куд ес, нур ӕ кари ци силгоймаг бацудӕй, уой царди хабӕрттӕ цубурӕй кӕнгӕй, уомӕн ӕ уоди конди еу  дессаги менеуӕги - ӕ зӕрдӕбӕлдарундзийнади, «память» ке фӕххонӕн, уой туххӕй. Нуртӕгки ӕй бафӕрсӕ - хӕстӕг ин уа, ма уа - еске царди, мугкаги, бийнонти историбӕл хонхӕй - будурмӕ, ка ци кари кӕми цардӕй, ке хуӕрифурт адтӕй, ка ци кари рамардӕй ӕма уотӕ идарддӕр, ӕнӕ фӕкъкъуӕзгӕй дин дзуапп ратдзӕнӕй алли фарстабӕл дӕр.

     Къуар анзей разӕй Коля ӕма Дуняй сӕ зӕнӕг нӕбал ниууагътонцӕ гъӕуи, горӕти син ӕнцондӕр цӕрӕн уодзӕнӕй, зӕгъгӕ. Фал сӕ уӕддӕр еудадзуг сӕ къах ивазта, ци адӕми астӕу берӕ фӕццардӕнцӕ, уордӕмӕ. Адтӕй сӕмӕ бастдзийнадӕ сӕ хӕццӕ – арӕх дзурдтонцӕ телефонӕй дӕр. Ӕма уи байруагӕс уӕд,  Дуняй некӕд багъудӕй гъӕути фулдӕр адӕмти телефони номертӕ агорун киунугути, зудта сӕ ӕ фондз ӕнгулдзей хузӕн.

    Абони дӕр ма хеуӕнттӕмӕ ести бӕрӕгбон, е киндзӕхсӕвӕртӕ уогӕй ӕнӕ байагоргӕ нӕ фӕуунцӕ Дуняй. Ӕрӕмбурд ибӕл унцӕ кӕстӕртӕ, алке дӕр си фӕффӕндуй ӕ мугкаги историйӕй, ӕ рагфиддӕлти царди уагӕй еститӕ базонун, ӕма син Дуня рӕдауӕй бахай кӕнуй ӕ зонундзийнӕдтӕй, ӕнӕгъӕнӕ 7 фӕлтӕрей уӕнгӕ дӕр. Хонгӕ дӕр ӕй «нӕ компьютер» кӕнунцӕ етӕ.    

    Дуня ӕ дуйней дӕр берӕ уарзта адӕми хӕццӕ цӕрун. Адтӕй рӕдау къох, къӕбӕрдӕдтон силгоймаг. Ӕ конд хуӕруйнӕгти адӕ ин дӕнцӕн хаста берӕ адӕм. Фонс дарагӕ адтӕнцӕ, цалинмӕ гъӕуи цардӕнцӕ, уӕдмӕ. Ӕма ӕрмӕст сӕ уорсагӕй ке хай кодтонцӕ синхонтӕ, хӕстӕгутӕ, зонгитӕн, е дӕр дессагӕн бӕзтӕй. Аллихузи дӕр ӕгъдау лӕвардта Дуня ӕ теутӕ, лӕги хуӕртӕн, сӕ зӕнӕгӕн. Ӕма еци хуарз менеугутӕ ӕнӕмӕнгӕ рацудӕнцӕ сӕ тогӕй исӕнтӕсӕг сувӕллӕнттӕмӕ – Толик, Тамир, Алан, Антӕнинӕ ӕма Аллӕмӕ. Ӕма ма син цӕрӕд ӕнӕнез ӕма иуонгрӕуӕгӕй, ӕ сӕдӕ анзей сӕрти ракӕсгӕй, сӕ изӕди хузӕн хестӕр, нӕ еугурей уарзон Дуня, ӕ кӕстӕртӕй сӕрустур ӕма зӕрдӕрохс уогӕй!

                                           Чихтисти Р.